Logon Mein Phaili 40 Ghalat Fehmiyan (Part-1)

Logon Mein Phaili 40 Ghalat Fehmiyan (Part-1)

= = = = = = = = = = = = = = = =

Tahreer: Shaikh Maqbool Ahmed Salafi Hafizahullah

Social Media Par Kai Mahino Se Aik Post Ghoom Rahi Hai Jis Mein Bataya Gaya Hai Key 40 Baton Se Ghar Mein Gurbat (Ghareebi) Aati Hai. Aaiye Aik Aik Karkey Un Baton Ko Dekhtey Hain Ki Wo Kitni Sahih Hain:

(1) Ghusl Khanay Mein Pishaab Karna:

Hamaam (Ghusl Khaney) Mein Peshaab Karney Se Nabi Sallallahu Alaihi Wasallam Ne Mana Farmaya hai Magar Us Waqt Ke Hamaam Matti Ke Hotay They or Aaj Kal Key Hamaam Pakkey Hotey Hain, Is Liye Us Mein Peshaab Karna Jayez Hai. Aur Yeh Nabi Sallallahu Alaihi Wasallam Key Farmaan Mein Nahi Hai Key Hamaam Mein Peshaab Karne Sey Gurbat (Ghareebi) Aati Hai, Hazrat Ali Radhiallahu Anhu Ki Taraf Yeh Qoul (Baat) Mansoob Kiya Jata Hai Magar Yeh Jhoot Hai.

(2) Tooti Hui Kanghi (Comb) Se Kangha Karna:

Nabi e Akram Sallallahu Alaihi Wasallam Ka Hukm Hai : Jis Key Baal (Hairs) Hon Woh Un Ki Izzat Karey.

(Abu Daud: 4163) Sahih

Is Hadees Sey Pata Chala Key Balon Ki Zeenat Key Liye Kanghi Karni Chahiye. Chahay Kanghi Tooti Ho Ya Salim Ho (Tooti Hue Na Ho), Agar Kaam Layeq Hai To Kanghi Karen Koi Harj Nahi Hai Aur Na Hi Is Key Karne Sey Gareebi Aati Hai.

(3) Toota Hua Samaan Istemaal Karna:

Toota Hua Samaan Kaam Key Laiq Ho To Us Ka Istemaal Jayez Hai.

Hazrat Umm e Salma Radhiallahu Anha Sey Riwayat Hai Key Woh Rasool Sallallahu Alaihi Wasallam Aur Sahaba Radhiallahu Anhum Key Liye Aik Chaudey Bartan Mein Khana Layein. (Itnay Mein) Hazrat Aisha Radhiallahu Anha Aa Gaien. Unhon Ne Aik Chadar Ourh Rakhi Thi Aur Un Key Paas Aik Paththar Tha. Unhon Ney Paththar Maar Kar Bartan Tod Diya. Nabi e Akram Sallallahu Alaihi Ne Bartan Key Dono Tukdon Ko Mila Kar Rakha Aur Do Baar Farmaya: Khao, Tumhari Maa Ko Ghairat Aagai Thi. Us Key Baad Rasool Allah Sallallahu Alaihi Wasallam Ney Hazrat Aisha Radhiallahu Anha Ka Bartan Ley Kar Hazrat Umm e Salma Radhiallahu Anha Key Haan (Ghar, Paas) Bhej Diya Aur Hazrat Umm e Salma Radhiallahu Anha Ka (Toota Hua) Bartan Hazrat Aisha Radhiallahu Anha Ko Day Diya.

(Sunan Nasai: Kitab: عشرة النساء, Baab: الغیرۃ: Hadees No: 3956)

*Allama Albani Rahimahullah Ne Hadees Ko Sahih Kaha Hai.

(Sahih Sunan Nasai: 3693)

(4) Ghar Mein Koda Karkat (كوڑا کرکٹ) Rakhna:

Ghar Ka Koda Karkat Ghar Key Kisi Konay Mein Jama Karney Mein Koi Harj Nahi Hai, Jab Ziyada Ho Jaye To Phenk Den. Is Mein Aik Ehtiyat Yeh Hona Chahiye Key Khanay Peenay Ki Bachi Hui Zayed (Zada) Cheezen Zaya (Barbad) Na Karen Balkay Kisi Ko De Den. Ghar Mein Koda Rakhnay Se Gareebi Aati Hai Yeh Bhi Hazrat Ali Radhiallahu Anhu Ki Taraf Mansoob Jhooti Baat Hai.

(5) Rishtey Daron Sey BadSulooki Karna:

Aisa Koi Khaas Farmaan e Nabwi Sallallahu Alaihi Wasallam Nahi Hai Key Rishtey Daaron Sey BadSulooki Gurbat Ka Sabab (Reason) Hai, Lekin Bohat Saaray Aisay Dalail Hain Jin Se Pata Chalta Hai Key Masiat (Nafarmani) Aur Gunah Key Kaam Se Rizq Mein Tangi Hoti Hai.

(6) Bayen Pair Sey Pajamah Pehnna:

Mumkin Hai Key Is Se Murad Ho Pajama Pahannay Mein Bayen Janib Se Shuru Karna. Nabi e Akram Sallallahu Alaihi Wasallam Sharf Wala Kaam Dayen Se Pasand Farmatay They, Is Bina Par (Is Wajah Sey) Dayen Janib Sey Pajama Pehnna Behtar or Mustahab Hai Jaisa Key Hadees Mein Ye Baat Maujood Hai. (Dekhen: Sahih Bukhari: 168).

Magar Kisi Ne Bayen Se Pehan Liya To Koi Masiat (Nafarmaani) Nahi Hai Aur Na Hi Yeh Faqr o Faqa (Poverty and Starvation) Ka Sabab Banay Ga.

(7) Maghrib or Isha Keu Darmiyan Sona:

Maghrib Aur Isha Key Darmiyan Sona Makrooh Hai, Is Ka Sabab Isha Ki Namaz Faut Ho Jana Hai Is Liye Nabi e Akram Sallallahu Alaihi Wasallam Isha Sey Pehlay Sona Aur Isha Key Baad Baat Karna Napasand Farmatay They. Jaisa Ki Hadees Mein Aaya Hai (Dekhen Bukhari: 568).

Agar Koi Adatan (Routin Key Etbaar Sey) Nahi Zarooratan (Zaroorat Ki Wajah Sey) Kabhi So Jaye To Woh Isha Ki Namaz Aadhi Raat Se Pehlay Kabhi Bhi Parh Le.

(8) Mehman Anay Par Naraaz Hona:

Islam Ne Mehmaan Ki Khatir Daari Par Ubhara Hai, Lihaza Kisi Mehman Ki Aamad Par Narazgi Ka Izhaar Na Karen. Mehman Nawazi Bahar Se Anay Walay Musafir Ke Wastay Wajib Hai Aur Jo Muqeem Ho Us Ki Ziyafat Ehsaan o Sulook Ke Darjay Mein Hai. Jis Ney Ziyafat Mein Ehsaan Ko Chora Us Par Gunah Nahi Magar Wajibi Ziyafat Ko Chorney Par Masiyat (Nafarmani) Aeyegi. (Ahadees Key Liye Dekhen: Sahih Bukhari: 6135 or 6138)

(9) Aamdani Se Ziyada Kharch Karna:

Isay Bewaqoofi, Hamaqat, Nasamjhi Aur Faash Galati (Jo Galati Zahir Ho) Keh Satke Hain.

(10) Daant (Teeth) Se Rooti Kaat Kar Khana:

Daant Se Rooti Kaat Kar Khanay Se Gareebi Nahi Aati, Agar Aisa Hota To Duniya Mein Koi Maldaar Hi Nahi Hota Kiyunkay Danton (Tooth) Se Kaat Kar Hi Log Badey Hotay Hain. Rooti To Haath Se Bhi Tori Ja Sakti Hai Magar Aisi Bhi Bohat Cheezen Hain Jinhein Aksar Daant Se Hi Kaat Kar Khaya Jata Hai. Aaj Angrezi Style Aaya Hai Aur Dihaton (Villages) Mein To Nahi Shehron Mein Khanay Key Sath Chaaqo (Knife) Rakh Detey Hain Jabkay Aaj Se Pehlay Yeh Style Nahi Chalta Tha.

(11) Chalees Din Se Ziyada Zer e Naaf Ke Baal Rakhna:

Chalees Din Ke Andar Zer e Naaf Key Baal Saaf Kar Lena Chahiye Kiyunkay Rasool Allah Sallallahu Alaihi Wasallam Ne Yahi Had Muqarrar Ki Hai. Jaisa Ki Sahih Muslim Mein Hadees Hai. (Dekhen: Sahih Muslim: 258). Jo Is Se Ziyada Takheer (Late) Karte Hain Woh Sunnat Ki Mukhalifat Karte Hain.

(12) Daant (Teeth) Se Nakhun (Nails) Kaatna:

Islam Mein Kahin Danton (Tooth) Se Nakhun Kaatnay Ki Momaniyat Nahi Aayi Hai, Lekin Chunkay Islam Sehat Ki Hifazat Par Dhiyaan Dilaata Hai Is Liye Agar Daant Se Naakhun Kaatnay Mein Koi Tibbi (Medical) Nuqsaan Ka Pehlu Nikalta Ho To Is Se Parhaiz Kiya Jaye (Bacha Jaye) Aur Agar Is Mein Nuqsaan Nahi To Bhi Daant Se Nakhun Kaatna Sahih Nahi Lagta Kiyunkay Naakhun Mein Gandagi Hoti Hai Aur Gandi Cheez Ko Mun Se Pakarna Aur Danton Se Kaatna Sahih Nhi Lagta Kiunki Naakhun Mein Gandagi Hoti Hai Aur Gandi Cheez Ko Mun Se Pakarna Aur Danton Se Kaatna Sahih Nahi Hai, Khusoosan (Khaas Taur Sey) Logon Ke Samnay.

(13) Khadey Khadey Pajama Pehanna:

Pajama Khadey or Padey Dono Pehan Satkey Hain, Aap Ko Jismein Aasaani Ho Usey Ikhtiyar Karen. Aur Kisi Par koi Gunah Koi Faqr (Greebi, Poverty) Nahi Shariat Ki Janib Se.

(14) Aurton Ka khadey Khadey Baal Bandhna:

Yeh Koi Masla Nahi Hai. Is Mein Aik Hi Baat Ahem Hai Ke Aurat Ajnabi Mard Ke Samnay Baal Na Bandhay. Baqi Woh Khadey Ho Kar, Baith Kar Aur So Kar Kisi Bhi Tarah Baal Bandh Sakti Hai.

(15) Phatay Hue Kapray Jism Par Seena:

Phatay Hue Kapray Jism Par Hotay Hue Rafoo Karna Aasaan Ho To Is Mein Koi Harj Nahi Aur Utaarnay Ki Zaroorat Padey To Us Soorat Mein Usay Utaarna Hi Hoga.

Jari Raheyga…………………...

Romanized By: Umar Asari⁠⁠[1/20/201