سورہ فاتحہ سے متعلق سوال

ایک پریشان حنفی کا سوال

================

کچھ سوال جو ہمیں دن رات پریشان کرتے ہیں ۔

(1) اگر مقتدی پہ قراۃفاتحہ بھی ہو اور آمین بھی تو بتاؤ کہ اگر امام مقتدی سے پہلے سورہ فاتحہ سے پہلےفارغ ہو جائے تو یہ مقتدی جو ابھی فاتحہ کے بیچ میں ہے آمین کہے یا نہ کہے ۔ تواپنی فاتحہ ختم کرکے بھی آمین کہے یا نہ کہے جو بھی جواب دو حدیث دکھا کر دو۔ نہ دو آمین جائز ہیں نہ فاتحہ کے بیچ میں آمین درست ہے ۔

(2) اگر مقتدی فاتحہ کےبیچ میں ہو اور امام رکوع میں چلا جائے تو بتاؤ یہ مقتدی آدھی فاتحہ چھوڑ دے یارکوع چھوڑ دے جو بھی جواب دو حدیث دکھاؤ۔اپنی عقل و قیاس سے جواب نہ دینا۔

ہم آپ کے جواب کاانتظار کریں گے ۔

محمد یوسف سنی حنفی

الحمد للہ :

پہلے سوال کا جواب : مقتدی کا فاتحہ الگ ہے ، امام کا فاتحہ الگ ہے ۔ دونوں کو بس فاتحہ پڑھنے کا حکم ہے ،اس لئے یہ دونوں آگے پیچھے ہوسکتے ہیں ۔اس میں کوئی مضائقہ نہیں ۔ حدیث میں آمین کی موافقت کی فضیلت وارد ہے جو امام کی آمین کے ساتھ آمین کہے گا اسے یہ فضیلت ملےگی لیکن آمین کی موافقت یا عدم موافقت کا سورہ فاتحہ میں نقص یا نماز میں عدم صحت کا کوئی مسئلہ نہیں ہے ۔ روایت پہ غور کریں۔

عن أبي هريرة، أن رسول الله صلى الله عليه وسلم قال ‏"‏ إذا قال الإمام ‏{‏غير المغضوب عليهم ولاالضالين‏}‏ فقولوا آمين‏.‏ فإنه من وافق قوله قول الملائكة غفر له ما تقدم من ذنبه‏"‏‏. ‏ ‏(صحیح البخاری : 782)

ترجمہ : حضرت ابوہریرہ رضی اللہ عنہ سے روایت ہے کہ رسول اللہ صلی اللہ علیہ وسلم نے فرمایا جب امام غیرالمغضوب علیہم ولا الضالین کہے تو تم بھی آمین کہو کیوں کہ جس نے فرشتوں کے ساتھ آمین کہی اس کے پچھلے تمام گناہ معاف کر دیئے جاتے ہیں۔

آمین کی ساری حدیثوں سےپتہ چلتا ہے کہ متقدی کی آمین امام کی آمین کے ساتھ ہے ، الگ سے مقتدی کی آمین کا ذکر نہیں ہے ۔ لہذا جو مقتدی ابھی درمیانی فاتحہ پہ ہو وہ  یا جس نے اپنا فاتحہ مکمل کرلیا ہو وہ امام کےساتھ آمین کہے ۔

دوسرے سوال کا جواب :

اگر مقتدی فاتحہ کی قرات کرہی رہاہو اور امام رکوع میں چلاجائے تو اس کی دو صورتیں بنتی ہیں ۔

(1)اگر مقتدی نے فاتحہ کی اکثر آیات پڑھ لیا ہو امام کے رکوع سے اٹھنے سے پہلے فاتحہ مکمل کرسکتا ہو توفاتحہ مکمل کرے اور پھر رکوع میں جائے ۔ نبی ﷺ کا فرمان ہے :لا صلاۃ لمن لم یقرأبفاتحۃ الکتاب۔ (صحیح بخاری: 756 صحيح مسلم : 394)

ترجمہ : جس شخص نے سورہ فاتحہ نہیں پڑھی اس کی نماز نہیں۔

(2)اگرفاتحہ کی اکثرآیات باقی ہوں ، فاتحہ مکمل کرنے سے رکوع چھوٹنے کا خدشہ ہو تو جتنا پڑھا ہو اتنے پہ رکوع میں شامل ہوجائے، اس حال میں وہ معذور ہوگا اور فاتحہ اس سے ساقط ہوجائے گا کیونکہ نبی ﷺ کا فرمان ہے :إنما جعل الإمام ليؤتم

به ، فلا تختلفوا عليه ، فإذا كبر فكبروا ، وإذا ركع فاركعوا (بخاری : 722، و مسلم: 414)

ترجمہ : امام بنایاجاتا ہے اسی لئے کہ اس کی پیروی کی جائے لہذا تم اس سے اختلاف نہ کرو، جب وہ تکبیرکہے تو تم بھی تکبیر کہو اور جب وہ رکوع کرے تو تم بھی رکوع کرو اور جب وہ"سمع اللہ لمن حمدہ" کہے، تو تم "ربنا ولک الحمد" کہو۔

یہ حدیث متفق علیہ ہے۔

مجھے امید کہ ہے پریشان مقلد کی پریشانی دور ہوجائے گی ، اگرسوال اس لئے کیا تھاتاکہ واقعی علم حاصل کرےلیکن اگر سوال بدنیتی سے کیا تھا تو اس کی پریشانی میں مزید اضافہ ہوسکتا ہے۔ ہم اللہ سے اس کی پریشانی دور ہونے کی دعا کرتے ہیں ۔

دعاگو

مقبول احمد سلفی

طائف سعودی عرب