طب سے متعلق ایک ویڈیو کی اصل حقیقت

 

طب سے متعلق ایک ویڈیو کی اصل حقیقت

اس ویڈیومیں  تقریبا سات قسم کی احادیث بیان کی گئی ہیں ، ان سب احادیث کو حکم کے ساتھ آپ کی خدمت میں پیش کرتا ہوں ۔
پہلی حدیث: نبی ﷺ کا فرمان ہے:خيرُ طعامِكم الخبزُ، وخيرُ فاكهتِكم العنبُ(السلسلة الضعيفة:3576)
ترجمہ: تمہارے کھانوں میں سب سے بہترین کھانا روٹی ہے اور تمہارے پھلوں میں سب سے بہترین پھل انگور ہے ۔
شیخ البانی نے اس حدیث کو موضوع کہا ہے۔(مذکورہ حوالہ دیکھیں)
دوسری حدیث: نبی ﷺ کا فرمان ہے:كلوا التمرَ على الريقِ فإِنَّه يَقْتُلُ الدودَ( السلسلة الضعيفة:232)
ترجمہ: نہارمنہ کھجور کھاؤ کیونکہ یہ کیڑے کو مار دیتی ہے۔
شیخ البانی نے اس حدیث کو موضوع کہا ہے۔(مذکورہ حوالہ دیکھیں)
تیسری حدیث:نبی ﷺ نے فرمایا:أكلُ الطِّينِ حرامٌ على كلِّ مسلمٍ(السلسلة الضعيفة:2897)
ترجمہ: مٹی کھانا ہر مسلمان پر حرام ہے۔
شیخ البانی نے اس حدیث کو "ضعیف جدا" (بہت ضعیف) کہا ہے۔(مذکورہ حوالہ دیکھیں)
مٹی کھانے سے متعلق متعدد قسم کی روایات آتی ہیں ، میں نے ایک ہی حدیث کو پیش کیا ہے لیکن یہ سمجھ لیں کہ اس بارے میں کوئی حدیث صحیح نہیں ہے۔
چوتھی حدیث: نبی ﷺ کا فرمان ہے:إِنَّ هَذِهِ الْحَبَّةَ السَّوْدَاءَ شِفَاءٌ مِنْ كُلِّ دَاءٍ، إِلَّا مِنَ السَّامِ(صحیح البخاری:5687)
ترجمہ: یہ کلونجی ہر بیماری کی دوا ہے سوا ئے«سام» یعنی موت کے۔
کلونجی کے بارے میں بیان کی گئی حدیث صحیح ہے ۔
پانچویں حدیث: نبی ﷺ کا فرمان ہے:كلوا الثوم وتداووا به فإن فيه شفاء من سبعين داء(أخرجه الديلمى :3/245،رقم4721)
ترجمہ: لہسن کھاؤ اور اس سے علاج کرو کیونکہ اس میں ستر بیماریوں کے لئے شفا ہے ۔
یہ حدیث ثابت نہیں ہے۔(دیکھیں: الدرر السنية، أحاديث منتشرة لا تصح:246)
چھٹی حدیث: نبی ﷺ کا فرمان ہے:عليكُم بالزَّبيبِ ، فإنَّهُ يَكْشِفُ المُرَّةَ ويَذهَبُ بالبَلغمِ(ضعيف الجامع:3761)
ترجمہ: کشمش کو لازم پکڑو کیونکہ پت کو دور کرتا اور بلغم کو ختم کرتا ہے۔
شیخ البانی نے اس حدیث کو ضعیف کہا ہے۔(مذکورہ حوالہ دیکھیں)
ساتویں حدیث:زاذان رحمہ اللہ کا بیان ہے:أنَّ عليَّ بنَ أبي طالبٍ رضيَ اللَّهُ عنهُ شرِبَ قائمًا فنظرَ إليهِ النَّاسُ كأنَّهم أنكروهُ فقالَ : ما تنظرونَ ؟ أن أشرب قائمًا فقد رأيتُ النَّبيَّ صلَّى اللَّهُ عليهِ وسلَّمَ يشربُ قائمًا وإن أشرب قاعدًا فقد رأيتُ النَّبيَّ صلَّى اللَّهُ عليهِ وسلَّمَ يشربُ قاعدًا(مسند أحمد:795)
ترجمہ:سیدنا علی رضی اللہ عنہ نے کھڑے ہو کر پانی پیا،تو لوگوں نے ان کی طرف عجیب نظروں سے دیکھا،گویا اس عمل کو غلط سمجھ رہے ہوں۔آپ نے فرمایا : کیا دیکھ رہے ہو،اگر میں کھڑے ہو کر پیتا ہوں، تو اس لیے کہ میں نے نبی اکرم صلی اللہ علیہ وسلم کو کھڑے ہو کر پیتے دیکھا ہے اور اگر میں بیٹھ کر پیتا ہوں، تو اس لیے کہ میں نے نبی اکرم صلی اللہ علیہ وسلم کو بیٹھ کر پیتے دیکھا ہے۔
اس حدیث سے معلوم ہوا کہ نبی ﷺ کبھی کھڑے ہوکر بھی پی لیتے تو کبھی بیٹھ کر پیتے تاہم آپ کی عمومی عادت بیٹھ کر پینے کی تھی اور اس ویڈیو کا خلاصہ یہ ہوا کہ اس میں بیان کی گئی باتوں میں سے صرف دو باتیں ہی صحیح ہیں ، ایک بات چار نمبر کی اور دوسری بات سات نمبر کی ۔

مقبول احمد سلفی - جدہ دعوہ سنٹر، حی السلامہ