ظہر احتیاطی کا حکم

پہلے ظہر احتیاطی سمجھ لیں وہ یہ ہے کہ دیہات کے لوگ جمعہ کے دوگانہ کے بعد چار کعتیں اس  نیت سے پڑھتے ہیں کہ جمعہ اگر جائز نہ ہو تو یہ چار رکعتیں ظہر کی کفایت کر جائے گی ۔ اس کا ثبوت قرآن وحدیث میں کہیں سے نہیں ملتا بلکہ فقہ کی معتبر کتاب در مختار میں بھى اس کی  ممانعت  ہے۔

 اسے ظہر احتیاطی کہنا بدعت ہےاور اصلا عبادت کے ساتھ ایک طرح سے ناروا سلوک کرناہے ۔ ہمارا ان لوگوں سےجو اس قسم کا فتوی دیتے ہیں یہ سوال ہے کہ اگر دیہات میں جمعہ کی نماز نہیں ہوتی تو پھر جمعہ پڑھنے کا فتوی کیوں دیا جاتا ہے ،کیوں نہ ظہر ہی پڑھنے کا حکم دیا جاتا ہے تاکہ لوگوں کو اپنی عبادت پر شبہ نہ ہو۔ بڑا عجیب و غریب معاملہ ہے کہ ہم عبادت بھی کریں اور اس کی قبولیت کو مشکوک بھی سمجھیں ، یہ کس قسم کا معاملہ ہے ؟ ذرا اس بارے میں بغورتامل فرمائیں۔ قرآن کریم نے توصاف طور پر اعلان کردیاہے ۔

﴿اِذَا قَضَیْتَ الصَّلٰوة فَانْتِشِرُوْا فِی الْاَرْضِ﴾

’’نماز جمعہ ختم ہونے ہی حصول معاش وغیرہ کے لیے بکھر جایا کرو۔‘‘

اس آیت سے صاف ظاہر ہے کہ جمعہ کی نماز کے بعدہم روزی روٹی کی تلاش میں نکل جائیں۔