کیا اللہ تعالی علی رضی اللہ عنہ کے ذریعہ مدد کرتا ہے ؟

کیا اللہ تعالی علی رضی اللہ عنہ کے ذریعہ مدد کرتا ہے ؟

======================

مقبول احمد سلفی

شیعہ حضرات کے یہاں حضرت علی رضی اللہ عنہ کے متعلق بہت غلو پایا جاتا ہے ، ان میں سے ایک یہ بھی ہے کہ وہ حضرت علی کو مشکل کشا سمجھتے ہیں ۔ اپنے اس عقیدے سے سادہ لوح مسلمانوں کو گمراہ کرنے کے لئے ضعیف و موضوع احادیث بیان کرتے ہیں ۔ کہیں تو وہ حدیث ہی نہیں مانتےیہاں تک کہ بخاری ومسلم کی بھی کوئی حدیث صحیح نہیں مانتے اور کہیں حدیث کے نام پر گھڑی ہوئی باتیں پھیلاتے ہیں ۔ کنزالعمال (علاء الدین علی متقی بن حسام الدین برہان پوری متوفی:975) سے ضعیف حدیث لےکر لوگوں کو بتلاتے ہیں کہ دیکھو یہاں اللہ کا حضرت علی کے ذریعہ مدد کرنا لکھا ہے ۔

کنزالعمال میں وارد حضرت علی سے متعلق روایت کا مختصر حکم آپ کی خدمت میں پیش ہے ۔

اللہ کا حضرت علی کے ذریعہ مدد اور تائید والی روایت چند طرق سے مروی ہے مثلا ابوالحمراء ھلال بن حارث اور جابر بن عبداللہ وغیرہ ان کے علاوہ بھی دیگر طریق مثلا ابوھریرہ ،انس بن مالک،ذکوان اور عبداللہ بن عباس  رضی اللہ عنہم سے مروی ہے مگر سارے طرق میں ضعف ہے ۔

(1) ابوالحمراء والی روایت کو شیخ البانی نے موضوع کہا ہے ۔( السلسلة الضعيفة:4902)

علامہ ذہبی نے کہا کہ اس کو گھڑنے والا احمد بن حسین کوفی ہے ۔(تلخيص العلل المتناهية:79)

(2) جابر بن عبداللہ والی روایت کو ابن الجوزی نے صحیح نہیں قراردیا ۔(العلل المتناهية:1/237 )

اس میں ایک شیعہ راوی اشعث متکلم فیہ ہے ۔(ميزان الاعتدال:1/269)

(3) ابوھریرہ والی روایت میں عباس بن بکار منکرالحدیث ہے ۔( لسان الميزان:4/403)

(4) انس بن والی روایت کو علامہ ذہبی نے مختلق کہا ہے ۔(ميزان الاعتدال:1/530)

(5) ذکوان والے طریق کو علامہ ذہبی نے باطل قرار دیا ہے ۔(ميزان الاعتدال:2/382 )

(6) عبداللہ بن عباس والی روایت کے متعلق حافظ ابن کثیر نے کہا کہ اس میں محمد بن أبي الزعيزعة منکر روایت کرنے والا ہے ۔(لسان الميزان:7/137)

خلاصہ یہ کہ یہ روایت کسی بھی جہت سے قابل استدلال نہیں ہے یہ ضعیف وموضوع ہے ۔