اللہ تعالی کے علاوہ کوئی عالم الغیب نہیں ،(نبی،ولی اور) فرشتے بھی نہیں ۔

اللہ تعالی کے علاوہ کوئی عالم الغیب نہیں ،(نبی،ولی اور) فرشتے بھی نہیں ۔

قرآن کی متعدد آیات سے پتہ چلتا ہے کہ غیب داں صرف اور ٖصرف اللہ جل جلالہ ہے، اس کے علاوہ عالم الغیب کوئی نہیں ۔ قرآن کا بیان ہے اللہ کے علاوہ آسمان و زمین کا کوئی بھی عالم الغیب نہیں ۔ آسمان کے ذکر سے یہ بات صاف ہوجاتی ہے کہ فرشتے بھی غیب اور بھید کی چیزوں سے ناواقف ہیں اور زمین کے ذکر سے نبی و ولی کے لئے بھی علم غیب نفی ہوجاتی ہے ۔

اب قرآن کی چند آیات ملاحظہ فرمائیں۔

(1)       وَلِلَّهِ غَيۡبُ ٱلسَّمَـٰوَٲتِ وَٱلۡأَرۡضِ وَإِلَيۡهِ يُرۡجَعُ ٱلۡأَمۡرُ كُلُّهُ ۥ فَٱعۡبُدۡهُ وَتَوَڪَّلۡ عَلَيۡهِ‌ۚ وَمَا رَبُّكَ بِغَـٰفِلٍ عَمَّا تَعۡمَلُونَ ۔

ترجمہ : اور اﷲ ہی کے لئے ہے غیب آسمانوں کا اور زمین کا اور اسی کی طرف لوٹائے جاتے ہیں تمام معاملات سو اسی کی عبادت کرواور بھروسہ رکھو اسی پر اور نہیں ہے تیرا رب کچھ بے خبر ان کاموں سے جو تم کرتے ہو۔ (ھود:١٢٣)

(2)      قُل لَّا يَعۡلَمُ مَن فِى ٱلسَّمَـٰوَٲتِ وَٱلۡأَرۡضِ ٱلۡغَيۡبَ إِلَّا ٱللَّهُ‌ۚ وَمَا يَشۡعُرُونَ أَيَّانَ يُبۡعَثُونَ

ترجمہ : اے نبی ! ان سے کہو نہیں جانتا جو بھی ہے آسمانوں میں اور زمین میں ،غیب کو سوائے اﷲکے اور نہیں جانتے وہ تو یہ بھی کہ کب دوبارہ اٹھائے جائیں گے۔ (النمل:٦٥)

(3)   وَلِلَّهِ غَيۡبُ ٱلسَّمَـٰوَٲتِ وَٱلۡأَرۡضِ‌ۚ وَمَآ أَمۡرُ ٱلسَّاعَةِ إِلَّا كَلَمۡحِ ٱلۡبَصَرِ أَوۡ هُوَ أَقۡرَبُ‌ۚ إِنَّ ٱللَّهَ عَلَىٰ ڪُلِّ شَىۡءٍ۬ قَدِيرٌ۬۔

ترجمہ : اور اﷲ ہی کے لیے خاص ہے پوشیدہ حقائق کا علم (جو ہیں )آسمانوں اور زمین میں اور نہیں ہے قیامت کا معاملہ مگر مانند آنکھ جھپکنے کہ بلکہ وہ اس سے بھی جلد تر ہے ۔بے شک اﷲہر چیز پر پوری طرح قادر ہے۔ (النحل:٧٧)

(4)وَعِندَهُ ۥ مَفَاتِحُ ٱلۡغَيۡبِ لَا يَعۡلَمُهَآ إِلَّا هُوَ‌ۚ وَيَعۡلَمُ مَا فِى ٱلۡبَرِّ وَٱلۡبَحۡرِ‌ۚ وَمَا تَسۡقُطُ مِن وَرَقَةٍ إِلَّا يَعۡلَمُهَا وَلَا حَبَّةٍ۬ فِى ظُلُمَـٰتِ ٱلۡأَرۡضِ وَلَا رَطۡبٍ۬ وَلَا يَابِسٍ إِلَّا فِى كِتَـٰبٍ۬ مُّبِينٍ۬۔

ترجمہ : اور اسی کے پاس ہیں کنجیاں غیب کی نہیں جانتا انہیں کوئی سوائے اس کے اور وہ تو جانتا ہے اسے بھی جو خشکی میں ہے اور جو سمندر میں ہے اور نہیں جھڑتا کوئی پتہ مگر وہ اس کے علم میں ہے اور نہ کوئی دانہ زمین کے تاریک پردوں میں ایسا ہے اور نہیں کوئی تر اور نہ خشک (چیز)مگر وہ روشن کتاب میں (درج) ہے۔ (الانعام :٥٩)

(5)   هُوَ ٱللَّهُ ٱلَّذِى لَآ إِلَـٰهَ إِلَّا هُوَ‌ۖ عَـٰلِمُ ٱلۡغَيۡبِ وَٱلشَّهَـٰدَةِ‌ۖ هُوَ ٱلرَّحۡمَـٰنُ ٱلرَّحِيمُ۔

ترجمہ : وہ اﷲ ہی ہے نہیں کوئی معبود سوائے اس کے جاننے والا غائب وحاضر کا بڑا مہربان نہایت رحم کرنے والا۔ (الحشر:٢٢)

ان تمام آیتوں کے مطالعہ سے ثابت ہوتا ہے کہ غیب کا علم صرف اﷲہی کے ساتھ خاص ہے اس کے علاوہ کسی کے پاس یہ علم نہیں کہ وہ چھپی ہوئی چیزوں کو جان لے ۔

قرآن کے علاوہ احادیث سے بھی یہ بات ثابت ہے ، بطورمثال میں ایک حدیث شریف پیش کرتا ہوں ۔

عبداﷲ بن عمر رضی اﷲ عنہما سے روایت ہے کہ رسول اﷲ صلی اﷲ علیہ وسلم نے فرمایا غیب کی پانچ کنجیاں ہیں جنہیں اﷲ تعالیٰ کے علاوہ کوئی نہیں جانتا ۔

(1)عورت کے پیٹ میں کیا ہے ۔

(2)کل کیا ہوگا۔

(3)بارش کب ہوگی۔

(4)جاندار کس سرزمین پرمرے گا ۔

(5)قیامت کب آئے گی۔

(صحیح البخاری جلد سوم صفحہ ٧٦٢/ح٢٢١٦)

اس حدیث اور مذکورہ بالاقرآنی آیات سے یہ بات روز روشن کی طرح عیاں ہوجاتی ہے کہ علم غیب خاص صفت الٰہی ہے ۔ﷲتعالیٰ اپنی صفات اور ربوبیت کسی کو بھی عطا نہیں فرماتا۔ﷲتعالیٰ ہی ازل سے ابد تک کے تمام حالات کو جانتا ہے اور وہی اس کائنات کے نظام کو اپنے علم اور تدبیر سے چلارہاہے ، اس کام میں اس کا کوئی ایک بھی شریک نہیں اور اسے کسی کی مدد کی ضرورت بھی نہیں ۔